ساكنه ابراج الحمام

كنت عايزه أسأل عيونه
تسأل النجم المسافر
هو جاب لى معاه قمر
هو واخد منى ذكرى
شالها جوه نن عينه
كل أوقات السفر
هو روّح روح ضنينه
زوّد البوح وف عيونه
مَد مرسى فيها أرسى
لما يحلى لى السهر
اصلى فاجأه غصب عنى
إلتفت شُفت إنى
كنت بالضم ف النجوم
وأفهم المعنى ف كلام
شفته بيشاور علىّ
ف انشغلت عنّه توهت
والشنط كانت زحام
والرصيف مشتاق سلام
والساعات بتقول له يالا
الجرس صفّر تمام
غصب عنه قام مسافر
غصب عنى قمت أشاور
غصب عنّا شُفنا روحنا
ساكنه أبراج الحمام