حلاوة زمان
بحلمى البسيط
وضحكى العبيط
وفرحة عيونى
بإبن الجيران
بشعرى اللى غجرى
وموجه امّا يجرى
وألملم جِنانه
ف ديل الحصان
بطعم القُلل
وريقها اللى نازز
ف جوفنا عسل
ف حُضنى لقوامها
ولثمى لزلالها
ساعة لمّا تحْلى
ما بينا القُبل
وتفرح بشوقى
تزغرد بشوقها
وترجع مكانها
ف حضن البَلل
ولو غبت عنها
تقفّل خيالها
وتنْشَع حيطانها
ملوحة مَلل
حلاوة زمانى
اللى ماشى بكيفه ..
بصدقُـه وزيفُـه ..
ف عمرى بحاله
بكل الأمان
وجه لحد كيفى ..
صبحْ أُلعبان !!
موضوع: حلاوة زمااااااان 
الأحد أغسطس 13, 2017 5:08 pm