يا صبح يا مارد
يا طالع النخله
خللى الهوا الشارد
يحدف لى لو تمره
واملى كيزانى العسل
من سُكره الخَمره
واحدف لى وإتوصى
من أحمره الجمره
يعنى ماهيش قصه
لو أفتكر نفسى
واتركها تتبغدد
من نفسها مرّه
مش يبقى من كُله
دوق م الرطب خَلّه
م اللى إتعطب كُلّه
م اللى إتحدف طَلّه
م الإنتظار مَلّه
د لا يرضى طلُعاتك
ولا حلّله ألله
يا طالع النخله
حبيان على طولها
وعنينا بتسمى
عماله تحسب لك
أخرك وأولها
إحدف لى فكرايه
من شوقك الحابى
أغزلها قمرايه
تتصر فى جرابى
تبقى لى طاقة نور
لو نورها هيجافى
وابنى ف خيالى جسور
لو حابه أعدى لها
يا طالع النخله
وعنينا مشدوده
عامله الرموش منديل
وبتنتظر عوده
أو بالقليل مرسال
يقدر يطمنها