و مش أحسن
نحط النسمه ف الأباريق
وناخد بعضنا ع البحر
ونحضن منظر الميه
وكام غنوه يا امريه
وتبقى النسمه بلّة ريق ؟؟
و مش أحسن
نسيب الدنيا تتكركب
ووسط النيل ناخد مركب
ويسبق حلمنا يركب
ولا نسألش رايحين فين
ونحسب لهفة المشتاق
ونزرع للتلاقى عيون
وتبقى اللُقيا بيك يا عناق
كما الوسْعة ف وسط الضيق ؟؟
مش الأحسن
نعدى ع اللى مش ممكن
ونوصِل فيه خيال يمكن
نصحى المستحيل ذاته
ويبنى ف الخيال بيته
ونبلُع حلمنا ونفوق
ومش أحسن
لو اللى بقوله ده أوهام
وأضغاث من الأحلام
لا بحرى إتملى ميّه
ولّا غنوه لإمريه
ولا إبريقنا كان تنسيم
لكن يكفى إننا عيشنا
وكفّى ملحنا عيشنا
وسيبنا الحلم يسبقنا
طلع له خطوتين قُدّام
موضوع: مش الاحسسسسسن 
الثلاثاء يوليو 25, 2017 11:49 pm