ممكن سؤال ؟
----------
الفجر ف عينك د طبيعى
ولّا دَ لينسيز
يعنى بيبهر من غير داعى
ولّا تمرُس
طب الألوان شغل صناعى
ولّا تخصُص ؟؟
يعنى أنا ممكن
أرسم منهم دنية حواديت ؟؟ ؟
وأمسك ريشه وأعمل عِيشه
لها سقف وبيت ؟؟
وأجيب الأزرق م الننى
وأبنى لى سما ؟؟
وأحوّش حبه وارشرشهم
فوق بحرى انا ؟؟
وأرقّص لأخضر والأصفر
ف عيون الغيط
وأفتح شبابيك باصه عليهم
فوق خد البيت
وارسم غَلّه
وارسم لى كفوف زى رحايه
وأخبزهم عيش
وارسم قُله
وارسم لها قاعده وضلايه
على سطح الشيش
وارسم بلسم م اللون لأبيض
يشفى لى الحلو أبو قلب أبيض
ويقول يا حلو هتتعوّض
رغم التنتيش
د الوجع اللى الأعمى ابو دم تقيل
رغم رزالته ورغم غباوته
عنك بقشيش