خلاص كفيانا غميضه
كبرنا خلاص
حفظنا ملامح الأوضه
اّدى زاويه واّدى زاويه
ودى زاويه ودى زاويه
ودى اّهه بتنهيده
ودا فكرى اللى ما بيهدى
ولا بتخيل له ترويضه
ودا الشباك وترابيسه
واّدى الباب ومتاريسه
ودا الكتف المعبّى غبار
من الماشيه حزى العيطه
ودى صوره من امبارح
ودى اّيه وتحويطه
كبرت خلاص
حفظت ملامح الأوضه
ف لوّن لى الحيطان فضه
وهات لى ملاك بيتوضى
وخلّى الشمس تضرب لى
خيوطها سلام
وإبنى فوق سطوع الحلم
حيطان تكعيبه مكشوفه
وبرج حمام
وقبل دا كله طيبنى
ورجع صوتى من تانى
يغنى لو ييجينى نهار
واّخر الليل يكلفتنى
كما طفله
تعبها الجرى والتنطيط
ف دنيا نعام
شقاها المشى جنب الحيط
وعايزه تنااااااااااااااااااااااااااام