صباح جاى ولا الحاوى

صباح جالنا ولا الحاوى

تقولش د جن ومخاوى

يمد ادينه ف جرابه

يطلع فرح وغناوى

ويبسط ايده ع الصحرا

ويعمل للندا مجرى

ويملا ربوعها بالخُضره

تقابل بيه ال جاى بكره

ويبُدر للهنا تقاوى

وانا واقفه وبتفرج

على بيلياتشو بيهرج

يعلق غصن م الشجره

ويتنطط عليه ويُعرج

واحس بنفسى عصفوره

وبتتنطط على ضَيه

بتطوى ضحكه مكسوره

وبرسم ضحكتى زيّه

أصله ف ضحكه يشبه لى

عيونه مش غريبه عنى

انا وهوه يطوّحنا الهوا مراجيح

وبنعافر ف وش الريح

ولو ساب ع الجبين تباريح

بنتشوق جراب حاوى

يكون لنا طب ويداوى

ويفرش فوق صحارى الروح

بساط أخصر

ويبدر للهنا تقاوى