يشوفها بعين
غير كل ال شايفينها
ف تتعرى له م الزحمه وم الزينه
ف يسترها
بضى عنيه وشفيف روحه
ويتداروا ورا الخيمه
يعيشها بروح
غير كل ال عايشينها
ف تعلى بيه
حد غياهب الغيمه
ف ينشلْها بكف اديه
من العتمه وم الغيمه
وبين الشك ويقينه
خطاوى ف دايره حاكمينه
لا قادر يفتح الخطوه على الدنيا
ولا يطوّقها بمشاعره ومكنونه
ف بيمزّق
شرانق حيرته وظنونه
ويعلى فوق حدود روحه
تشدّه خطوته السابقه
لسابع ارض
يُقَع واقف
ويرسَى فوق قدم واحده
ويرسم دايره بالتانيه
بتقْطعها
مساكن شكْه ويقينه
يمدْ اديه
ويرسم زاويه مَفتوحه
على حدود السما السابعه
ولسه عنيه على الدنيا
وجناحاتها ال شايلينه
تزفْه دفوف
ف ينسى الخوف
بفكْره يطوف
على فصولها
يصاحبه خريف
ف رحلة شكْه ويقينه