مجروره من شعرها

مجروره من شعرها
من ألف عام كافر
لو مرّه زاد مُرّها
بتقاوحه وتعافر
وبرغم تجعيدها
بتدارى تلبيدها
وتلوّن الساتر
مُشتاقه بوح غنوه
أنغامها لون ضحكه
فيها السِنان اللبن
ما باستش عين الشمس
شايفه البراح خطوه
محتاجه تتدّادى
محتاجه رقة لمس
كارهه إنها مُهره
جواها روح طفله
جايه ف أوان فاجر
حالف ما يتنبت
طول ما القمر عاقر
طولِة ما قلبه الطوب
مهجور من السكان
طول ما الولد مصلوب
محروم هوى الرمان
لا شَد كَعبه الوتد
ولا وصْلته ميّه
ولا غُصنه كان ثاير
حِلفت ما تفرد شعرها
ولا مرّه تبعت وصْلها
ولا قدّها الفاير
غير ع الغلابه البردانين
اللى ناقصهم يحلموا
وإن حلموا مرّه يصطلوا
الحلم ما بيسمحش
فتروح لأوقات السفر
وتخلّلى عشّاقها العيون
يتدفوا ع الطاير