شوفت بعينى فى رحلتى دنيا
بس البحر فى دنيتى سَقف
والعايمين على وش الميه
حادفين عينهم يمّتى حّدف
شفت أسد بس بجناحات
والعصفور كان نسمة طيف
شوفت تلوج عازفه كمانجات
وإدين بتجدف تجديف
شوفت القطن طويل التيله
اللى اتشكل غزل بنات
شوفت الشمس اما بتغمز لى
وتسلط على العين مرايات
شوفت الغَمز أما بيهمس لى
إن الهايمين دول سلامات
شوفت الشوقه أما تشيل قُطنه
على طراطيفها وترسم بُعد
لأجل تبوس الأرض السمرا
تلغى ما بينهم بين أو حد
شوفت سحابها حَس غيابها
وإتكتل بالطول والعرض
وإزاى باس الأرض معاها
لأجل يأدى لعينها الفرض
بعدين شوفت المركبه وصلت
صَحّيت عينى بعد ما فَصلت
بين روحى العاشقه الطيران
وما بين حطّت رجلى الأرض
موضوع: رحلتى ويا السحاب 
السبت ديسمبر 03, 2016 7:54 am