صباح جالنا ولا الحاوى
تقولش د جن بيخاوى
يمد ادينه ف جرابه
يطلع فرح وغناوى
ويبسط ايده ع الصحرا
ويبعد عنها كل صفار
ويعمل للندا مِجُرى
يطُل النبت فى رحابها
ويملالها الربوع خُضره
وانا واقفه وبتفرج
على بيلياتشو بيهرّج
يعلق غصن م الشجره
ويتنطط عليه ويُعرج
واحس بنفسى عصفوره
وبتتنطط على ضَيه
يجبّر ضحكه مكسوره
أجبّر ضحكتى زيّه
ما انا وهوّ بتشعلق على المراجيح
وبنعافر ف مليون ريح
ولو ساب ع الجبين تبريح
بنتشوق غُنا حاوى
يكون لنا طب ويداوى
ويبدر فوق صحارى الروح
شقايق نبت لغناوى
تلالى لو يعز البوح
وتفرش للهنا تقاوى
موضوع: صباح جالنا ولا الحاوى 
السبت ديسمبر 03, 2016 7:41 am