ليه بتقبض ع الحديد
ليه متبت ف السراط
يجرى ايه لو يوم تحيد
لو تقدّم أو تأخّر
تضرب الحيطه بمبادئك
تمحى م الساعه الميعاد
يجرى ايه لو سبت روحك تنسلخ
من زواق الدنيا من كل القيود
خدت ايه قولى بمبادئك
غير برافو صح جدا ولّا مُدهش
نفسى مره حَد م الوعّظ يقايضك
وانت قوله مية برافو
ألف مليون مره مدهش
دنيتك دنيّة صوّر
حتى برّه الفاترينات
شايله عن عينها العوّر
والهياكل بالونات
رافضه حتى تغوص فى روحها
رافضه كونها فرقعات
والملامح زى تزويق الخَزف
والأسامى جت لها بمحض الصدُف
يعنى مصبوبه فى قوالب
شمع صلصال ولّا جبس
بس طبع الصّب غالب
وقت ما يحيد عن إطاره
وإنت روحك غاويه حبس
موضوع: ليه وليه وليه 
الجمعة أكتوبر 21, 2016 9:48 am